नवरात्र म्हणजे त्रीशक्तीचा उत्सव. या दिवसांत देवीच्या विविध रूपांची उपासना केली जाते, तिच्या सामर्थ्यांचा गौरव केला जातो. घराघरांत देवीची स्थापना होते, बोलताशांच्या गजरात स्त्रीशक्तीचे गान घुमते. मात्र, दैनंदिन आयुष्यात स्त्रीशक्तीला किती व्यासपीठ मिळते, हा प्रश्न कायमच विचारात टाकणारा आहे. या पार्श्वभूमीवर अलिबाग तालुक्यातील नागावची कन्या तनिषा वर्तक हिने धनुर्विद्या या कलेत मिळवलेले यश म्हणजे खऱ्या अर्थाने स्त्रीशक्तीचा ठोस प्रत्यय आहे.
अवघ्या चौदा वर्षांची तनिषा आज राज्य आणि राष्ट्रीय स्तरावरील स्पर्धांमध्ये विजय मिळवत आहे. धनुर्विद्या हा खेळ आपल्याकडे तुलनेने अपरिचित मानला जातो. त्यातही महिलांची नावे फार कमी ऐकायला मिळतात. अशा परिस्थितीत तनिषाने केलेली कामगिरी कौतुकास्पद ठरते. तिच्या प्रत्येक बाणातून उमटणारी अचूकता आणि चिकाटी पाहून तिच्या कलेचा परिचय होतो. स्पर्धेतील तिची एकाग्रता, संयम आणि आत्मविश्वास हेच तिच्या यशाचं मूळ आहे.
धनुर्विद्येसारखा खेळ निवडणे आणि त्यात पुढे जाणे हे तनिषासाठी सोपं नव्हतं. कारण हा खेळ केवळ शारीरिक ताकदीवर अवलंबून नसून मानसिक स्थैर्य आणि सातत्याचीही मागणी करतो. तनिषाने अभ्यासासोबत कठोर सरावाचं शिस्तबद्ध नियोजन केलं. सकाळच्या सरावापासून ते शाळेतील अभ्यास, त्यानंतर पुन्हा सराव या चक्रातून ती रोज नवीन ऊर्जा घेऊन पुढे सरकत गेली. तिच्या पालकांचा पाठिंबा, प्रशिक्षकांचं मार्गदर्शन आणि स्वतःचा आत्मविश्वास यामुळेच तिने राज्यस्तरावर सुवर्ण पदक मिळवले आणि राष्ट्रीय पातळीवर आपली छाप सोडली.
नवरात्रीच्या काळात देवीच्या सामर्थ्याचं स्मरण आपण करतो, पण तनिषासारख्या तरुणींमुळे या सामर्थ्याचं प्रत्यक्ष दर्शन घडतं. ती केवळ स्पर्धा जिंकत नाही, तर समाजातील इतर मुलींसाठी प्रेरणादायी आदर्श ठरते. “खेळात मुली मागे आहेत” हा गैरसमज ती आपल्या कामगिरीने मोडून काढते. तिच्या यशामुळे ग्रामीण भागातील इतर मुलींना देखील नवीन स्वप्नं पाहण्याचं आणि ती पूर्ण करण्यासाठी झगडण्याचं बळ मिळतं.
आजच्या काळात खेळ हे केवळ करमणुकीचे साधन राहिलेले नाहीत, तर ते करिअरच्या दृष्टीने नवनवीन संधी निर्माण करत आहेत. तनिषासारख्या तरुण खेळाडूंच्या यशामुळे या संधींचं भान समाजाला होत आहे. तिचं ध्येय केवळ पदक जिंकणं नाही, तर भारतासाठी आंतरराष्ट्रीय स्तरावर नावाजलेलं यश मिळवणं आहे. तिची जिद्द आणि चिकाटी पाहता हे स्वप्न नक्कीच पूर्ण होईल, याबाबत शंका नाही.
नवरात्रीत देवीच्या आराधनेसोबत तनिषाच्या प्रयत्नांचाही गौरव व्हावा, हे समाजासाठी महत्वाचं आहे. कारण खरी शक्ती ही केवळ देवतांच्या मूर्तीमध्ये नसून आपल्या आजूबाजूला कार्यरत असलेल्या अशा मुलींमध्ये दडलेली आहे. तनिषा वर्तक हिचं व्यक्तिमत्त्व म्हणजे त्या शक्तिस्वरूपेचं जिवंत मूर्त रूप आहे, जे प्रत्येक बाणाच्या अचूकतेतून, प्रत्येक पदकातून आणि प्रत्येक जिद्दीच्या क्षणातून प्रकट होतं.
