अलिबाग (प्रतिनिधी) : जिल्हा परिषद निवडणुकीनंतर काही काळ शांत असलेले अलिबागचे आमदार महेंद्र दळवी यांनी पुन्हा एकदा राष्ट्रवादी काँग्रेसचे ज्येष्ठ नेते सुनील तटकरे यांच्यावर जोरदार टीका केली आहे. स्थानिक स्वराज्य संस्थांमधील बदलत्या राजकीय समीकरणांवर भाष्य करताना त्यांनी तटकरे यांच्या पक्षातील प्रभावावरच प्रश्नचिन्ह उपस्थित केले.
“आज सुनील तटकरे यांना त्यांच्या पक्षातच कुणी विचारत नाही, अशी परिस्थिती निर्माण झाली आहे,” असा घणाघात आमदार दळवी यांनी केला. तसेच आगामी निवडणुकांमध्ये तटकरे कुटुंबाला उमेदवारी मिळेल का, याबाबतही त्यांनी शंका व्यक्त केली.
आमदार दळवी म्हणाले की, “आसन डळमळीत असलेल्या नेत्याच्या मुलाला पुन्हा तिकीट देऊ नये, अशी स्थानिक कार्यकर्त्यांची भूमिका आहे. आतापर्यंत सुनील तटकरे यांनी प्रत्येक निवडणुकीत आपल्या घरात तिकीट मिळवण्यासाठी विविध युक्त्या वापरल्या आणि त्या यशस्वीही ठरल्या. मात्र आता परिस्थिती बदलली आहे.”
स्थानिक स्वराज्य संस्थांमध्ये निवडून आलेल्या सदस्यांनी यावेळी वेगळा उमेदवार पुढे आणण्याचा निर्धार केल्याचा दावा देखील त्यांनी केला. त्यामुळे आगामी विधानसभा निवडणुकीपूर्वी रायगडातील राजकीय वातावरण पुन्हा तापण्याची चिन्हे दिसू लागली आहेत.
महेंद्र दळवी यांच्या या वक्तव्यामुळे राष्ट्रवादी काँग्रेसमध्ये नव्या चर्चांना उधाण आले असून, तटकरे समर्थकांकडून यावर काय प्रतिक्रिया येणार याकडे राजकीय वर्तुळाचे लक्ष लागले आहे.
