माजी आमदार सुभाष उर्फ पंडितशेठ पाटील यांच्या शुभहस्ते उद्घाटन; नागरिकांना मिळणार पर्यावरणपूरक इंधनाची सुविधा
अलिबाग (प्रतिनिधी): अलिबाग तालुक्यातील पेझारी येथे पुष्पक संदेश मोकल यांच्या नव्या सीएनजी पंपाचे उद्घाटन माजी आमदार सुभाष उर्फ पंडितशेठ पाटील यांच्या शुभहस्ते करण्यात आले. या उद्घाटन सोहळ्याला परिसरातील विविध क्षेत्रातील मान्यवर, पदाधिकारी, सामाजिक कार्यकर्ते, व्यावसायिक तसेच नागरिक मोठ्या संख्येने उपस्थित होते.
पेझारी परिसरात सीएनजी पंपाची सुविधा उपलब्ध झाल्यामुळे वाहनधारकांना मोठा दिलासा मिळणार आहे. पेट्रोल आणि डिझेलच्या तुलनेत सीएनजी हा पर्यावरणपूरक इंधनाचा पर्याय मानला जात असल्याने या सुविधेमुळे परिसरातील नागरिकांना तसेच सीएनजी वाहनधारकांना अधिक सोयीचे ठरणार आहे.
उद्घाटनप्रसंगी माजी आमदार सुभाष उर्फ पंडितशेठ पाटील यांनी पुष्पक संदेश मोकल यांचे अभिनंदन करून नव्या व्यवसायासाठी शुभेच्छा दिल्या. ग्रामीण व निमशहरी भागात अशा प्रकारच्या सुविधांमुळे नागरिकांच्या दैनंदिन गरजा स्थानिक पातळीवर पूर्ण होण्यास मदत होते, असे उपस्थित मान्यवरांनी नमूद केले.
या कार्यक्रमात उपस्थित मान्यवरांनी सीएनजी पंपाची पाहणी करून पंप व्यवस्थापनाला शुभेच्छा दिल्या. परिसरातील नागरिकांनीही या नव्या सुविधेचे स्वागत केले.
यावेळी पुष्पक संदेश मोकल यांच्यासह विविध क्षेत्रातील मान्यवर, पदाधिकारी, सामाजिक कार्यकर्ते, मित्रपरिवार आणि नागरिक उपस्थित होते. उद्घाटन सोहळा उत्साहपूर्ण वातावरणात पार पडला.
